Stranglers hafa í þrígang komið til Íslands og haldið tónleika. Fyrst árið 1978 í Laugardalshöll, síðan var það Kaplakrikinn 26 árum síðar og nú í byrjun mars á þessu ári á NASA. Alltaf að minnka tónleikastaðirnir sem þeir troða upp á.En þeir áttu að hætta með þetta nafn, Stranglers, árið 1990, þegar söngvari og aðal laga- og textasmiður hljómsveitarinnar, Hugh Cornwell, hætti eftir að hafa verið samfellt í bandinu frá stofnun þess, árið 1974. Hugh Cornwell var það sterkur karakter og góður tónlistarmaður að vitað mál var að án hans myndi hljómsveitin ekki dafna vel. En hinir meðlimirnir ákváðu frekar að berja hausnum við vegginn og að áfram skyldi haldið. Nýr söngvari var ráðinn, Paul Roberts heitir hann, (var ekki einu sinni skugginn af Cornwell) og hljómsveitin gaf út efni með þeim söngvara, allt þangað til hann hætti í fyrra og var Paul Roberts því jafnlengi í Stranglers og Hugh Cornwell. Afrakstur þeirra er þó ólíkur og Hugh Cornwell ansi mikið í hag.
Bendi á ágæta sjálfsævisögu eftir Hugh Cornwell, ber heitið A Multitude of Sins, sem útgefin var árið 2004. Allt um Stranglers frá upphafi og til þess er hann hætti.
Og þá er komið að inntakinu í þessari bloggfærslu: Ég vil fá Hugh Cornwell til Íslands til tónleikahalds. Hlusta á hann flytja öll bestu lög Stranglers og eitthvað af ágætum sólólögum sem hann hefur sent frá sér eftir að hann hætti í Stranglers. Þessi gaur er alvöru töffari, með alvöru rödd, frábær gítarleikari og hefur samið fullt af lögum sem koma til með að lifa góðu lífi allt þangað til við menn hættum að vera menn.
Það hlýtur að vera hægt að fá Hugh Cornwell til landsins - ég er viss um að hann á marga aðdáendur hér á landi - og vonandi gerist það fyrr en síðar. Það er komið nóg af heimsóknum Stranglers til Íslands - nú ætti að vera komið að Hugh Cornwell.
